第一天 20/1/2014 抵達花園大道

19號晚上坐CX凌晨機直航到約堡 (Jo'berg)，這一程12小時既旅程真係非常辛苦！本來經過多日連續返工已經好攰之下，應該一上機就可以大覺訓，但因為機上太焗，多次又訓又醒，搞到落機時非常疲倦。 經過1日1夜飛機旅程後，我地四人終於抵步！Welcome to South Africa！一到步，首先等兩位澳門人Victoria and Ronnie 去換錢(之後發現我返來換美金要超貴手續費)！之後我地check in 去食我地係南非既第一餐 -非洲雞！！

然後轉機由Jo'berg 到 George, 呢程內陸機反而舒服得多！經過一日一夜，我地終於到達旅程既第一站，George 花園大道(Garden Route), 呢度係南非白人渡假聖地，有寧靜幽美既風景，整條route 係沿海而建，所以有好多平海鮮食！

第一時間我地去Hertz 拎車，手續很簡單就完成，仲免費upgrade 左架靚車比我地tim。 本來我地book kia sportage, 現在比左架歐洲車，而且係Victoria 係澳門渣開個款，所以佢異常興奮！

接住下來我地先往住宿出發，我地住在一個叫Knysna 既地方湖邊，這裡有個遊艇會及手信街，都算很方便。 安頓好後我地去當地市場買菜。 我地入到一間黑人本地超市，幾乎沒有白人，慶幸沒出什麼事情。 返回住處後，大家都好累及等另外兩位同伴，就休息至晚上，然後大家一齊煮晚飯(實際得兩人), 食飯及計劃之後既行程。

出發準備

因為一次 Fansfare 一週年 50蚊平機票，就不顧一切地一早起身搶購。在沒有考慮到任何地方之下，只知要出走，就毅然買左一程長線旅程　－　南非。一個從未考慮咁快就會去既地方，沒有太多印象，只知道鑽石﹑ 鮑魚﹑ 動物﹑ AIDS ﹑ 危險等做代表既一個地方。

買完機票後，開始搵有關南非既任何資料。原本打算只有我地二人出發，期間無意中在背包客棧發現既一個post ，原來有好多其他人都買左 CX 50蚊機票，發現大家出發時間都差唔多。就係咁，結識左四個旅伴，開始一個新組合，新地方，新旅遊方式。大家主要都係經網上討論行程，直至出發之前只係正式見過兩次面，實在有太多不確定性同新鮮感，幸好大家都係充滿旅遊經驗，所以好客易夾到。不過其實主要都係由我同汶汶做決定及book野，亦即係由我去計劃。而我現在鍾意只plan概括既行程，細節的留待到步後隨著行程而改變，其實我很喜歡這種不確定性。因為在這種不確定性下才算是真正『自由行』，不然就直接參加旅行團就好了。

今次既旅程，係第一次因為旅行而要打針食藥。本來去南非其實完全唔需要打針食藥，而係去Zimbabwe 需要食瘧疾藥，另外最初我地唔知道會唔會去Zambia所以連黃熱針都打埋 (最後係冇去到)，仲順便打埋甲型肝炎﹑ 傷寒既預防針，真係十分怕死。

出發前準備既另一難題係換南非幣，本來最簡單方法係用美金到當地換錢，但我發現在只有恆生係有用電匯價換南非幣既服務，而呢樣服務連很多恆生職員都唔知道！最初以為很容易搞掂，但到提取現鈔時有一個大問題，就係恆生得好少貨，甚至冇！佢地只係識等市面收回既貨，而且個別分行服務態度奇差，最後要拜託在恆生工作既朋友幫忙提貨，真係萬分感激。

我既旅程就如之前一樣，盡可能放最長時間去一個地方，今次旅程總共用16天時間。代價係去旅行前夕要不停連續返工，先連續9日，再放1日，再連續8日…經過漫長既返工時間後，19/1/2014 23:55 呢一晚，正式踏上南非之旅！！